உன்னை போல் ஒரு ரசிகன்

சுட்டி குட்டி: அழகு நடனம்

2010-10-25T12:13:00.000-07:00

சமீபத்தில் இணையத்தில் உலவிக்கொண்டிருந்த பொழுது , ஒரு காணொளியை காண நேர்ந்தது. ஆப்கானி சுட்டி பெண்ணின் நடனம் , தன் மழலை மொழியில் பாடிகொண்டே ஆடுகிறது. நம்முடைய மனச்சுமையையோ அல்லது சோர்வையோ இறக்கி வைத்த ஒரு உணர்வை ஏற்படுத்துகிறது மற்றும் உற்சாக படுத்தும் கை தட்டல்களுக்கு ஏற்ற அதன் உடல் அசைவு , முகத்தில் வெளிபடும் அழகான வெட்கம் நம்மை ஓராயிரம் தடவை பார்க்க தூண்டுகிறது. இந்த காணொளி கீழே இணைக்கப்பட்டுள்ளது.

எந்திரன் - The ROBO

2010-10-03T19:08:00.000-07:00

எந்திரன் முதல் ஷோ தேவி தியேட்டர்ல பார்த்தாச்சு மற்றும் இரண்டாவது முறையும் இந்த படத்தை மாயாஜால்ல பார்த்தாச்சு. இந்த படத்தை பற்றிய என்னுடைய பார்வை.

இயக்குனர் சங்கர் இயக்கத்தில் , சூப்பர் ஸ்டார் ரஜினி நடித்து வெளி வந்துள்ள திரைப்படம் "எந்திரன்", படம் வெளி வருவதற்கு முன்னர் எந்த ஒரு படத்திருக்கும் இவ்வளவு எதிர் பார்ப்பை நான் பார்த்தது இல்லை. பல கோடி செலவு செய்து வந்துள்ள படம் அது அனைவரின் எதிர்பார்ப்பை பூர்த்தி செய்துள்ளதா...?

என்னை பொருத்த வரை இந்த கேள்விக்கு என்றுமே விடை கிடையாது. பொது தேர்தலில் இதுவரை யாராவது 100 % ஓட்டு வாங்கி வெற்றி பெற்றதை கேள்வி பட்டு இருக்கிங்களா... ?

பதிவுலகில் நிறைய நேர்மறை மற்றும் சில எதிர் மறை விமர்சனங்களை பார்க்க முடிந்தது. என்னை பொறுத்தவரை "எந்திரன்" திரைப்படம் கண்டிப்பாக ஒரு வெற்றி படமாக அமைய அது பெரும்பான்மையான ரசிகர்களுக்கு பிடித்திருந்தாலே போதும். அது நடந்து விட்டதாகவே நினைக்கிறேன்.

படத்தில் என்னை கவர்ந்த விஷயங்கள்,

1. வசீகிரன் : வித்தியாசமான ரஜினியை காண முடிகிறது. துவக்க பாடல் கிடையாது, பஞ்ச் டயலாக் இல்லை. Scientist எப்படி இருக்க வேண்டுமோ அந்த அளவு மட்டும் அழகான நடிப்பு.

2. சிட்டி (ரோபோ) : இந்த சிட்டி பாத்திரம் கண்டிப்பாக அனைவரையும் கவரும். பெரும்பாலும் பெண்கள் மற்றும் குழந்தைகளை குறிப்பாக கொண்டு சுஜாதாவால் உருவாக்கப்பட்டிருக்கும் என்று நினைக்கிறேன். படத்தின் முதல் பாதி அனைவருக்கும் பிடிக்கும் வகையில் அமைந்துள்ளது.

3. படத்தில் அங்கங்கே சுஜாதா டச் வசனங்கள் அருமை.

4. இரண்டாம் பாதியில் வரும் "வில்லன்". ரஜினி ரசிகர்களுக்கு புல் மீல்ஸ்.

5. படம் முழுவதும் ரஜினி மற்றும் ஐஸ்வர்யாவை சுற்றியே திரைக்கதை அமைத்தது.

6. இயக்குனர் சங்கர் தமிழில் செய்த புதிய முயற்சி. ஹாலிவுட் படங்கள் இதே மாதிரி வந்திருக்கலாம் ஆனால் தமிழில் இது முதல் முறை. அவருடைய உழைப்பு படம் முழுவதும் தெரிகிறது. கிராபிக்ஸ் சுமார் ரகம்தான் , ஆனால் படத்தின் செலவு ஹாலிவுட் படங்களுக்கு செய்யும் செலவில் 10 % கூட கிடையாது. அந்த வகையில் சங்கரை பாராட்டியே ஆக வேண்டும்.
7 . A . R ரெஹ்மான் . கடைசி இருபது நிமிட பிரமிக்க வைக்கும் இசை.

என்னை கவராதவை,
1 . இரண்டாம் பாதியில் வரும் நீண்ட சண்டை காட்சி. இதை தவிர்த்திருக்கலாம்.
2 . ரோபோ தீம் : ரஜினிக்கு டூப் போட்டு எடுத்தது. இதை கொஞ்சம் தவிர்த்து இருக்கலாம்.
கண்டிப்பாக எந்திரன் அனைத்து தரப்பு ரசிகர்களையும் கவர்வான் படம் ஒரு சிலர்க்கு பிடிக்காமல் இருக்கலாம் ஆனால் அது படத்தின் வெற்றியை பாதிக்காது. அதற்க்கு உதாரணம் IMDB ல் எந்திரனுக்கு 8 .2 . :)
http://www.imdb.com/title/tt1305797/

சூப்பர் ஸ்டார் படம் எப்பவும் சூப்பர் ஸ்டார்ட் தான் ... :)

அற்புதமான ஒரு காணொளி

2010-09-05T13:22:00.000-07:00

சமீபத்தில் நான் பார்க்க நேர்ந்த ஒரு காணொளி என்னை மிகவும் பாதித்தது ...மனிதர்களில் எத்தனை விதம்....அவர்களுக்குள் எவ்வளவு திறைமைகள் ...நீங்களும் அதை ரசிக்கட்டுமே என்று உங்களுடன் பகிர்ந்து கொண்டுள்ளேன். கண்டிப்பாக உங்களுக்குள் ஒரு பாதிப்பை ஏற்படுத்தும். பாருங்கள்.

நான் படித்து சிரித்த நகைச்சுவைகள்

2010-09-05T06:00:00.000-07:00

கணவன் மனைவி நகைச்சுவை

ஒரு கணவன் தன்னுடைய அலுவலக பணிகளை முடித்துவிட்டு வீட்டுக்கு திரும்பிகிறான். திருமணமாகி மூன்று மாதமே ஆன அவனுடைய மனைவி இனிப்புடன் காத்திருக்கிறாள். கணவனை பார்த்தவுடன் "நிறைய இனிப்போடு கணவனை நெருங்கி" ஏங்க

ஸ்வீட் எடுத்துக்கோங்க என்றாள்.

கணவனின் முகத்தில் வியப்பு, இன்னிக்கு என்ன விசேஷம் .... ஒன்னும் இல்லையே என்று கூறிக்கொண்டே வந்தான்...

மனைவி வெட்கத்துடன் "நான் கர்ப்பமா இருக்கேன்" என்றாள்.

அட சந்தோஷமான விசயமாச்சே , அப்பா அம்மாகிட்ட சொன்னியா ? ..அவங்கள வர சொன்னியா என்றான்...

மனைவி, "சொல்லலை..." !!!!

கணவன், "ஏன் ?"

மனைவி, "அடிப்பாங்க..!!!"

என்னது அடிப்பாங்களா ....? என்றான் கணவன்

அதற்க்கு மனைவி ..ஆமாங்க ...இப்படிதான் நான் காலேஜ்ல படிக்கும் போது ஒரு தடவ சொன்னேன் ..பின்னி எடுத்துட்டாங்க....!!!

கல்லூரி நகைச்சுவை

கல்லூரி மரத்தடியில் இரண்டு மாணவிகள் பேசிகொண்டிருந்தார்கள்.

ஒருத்தி படபடத்தாள் , சென்ற வருடம் என் காதலரோடு சேர்ந்து "காதலர் தினத்தை சிறப்பாக கொண்டாடியது தப்பாய் போச்சுடி...!!!

ஏன்டி...?

இந்தவருடம் "அன்னையர் தினம்" கொண்டாட வெச்சுட்டாண்டி ..அந்த பாவி

பழசு கண்ணா பழசு

2010-08-16T11:50:00.000-07:00

உங்களுக்கு நல்ல இனிமையான பாடல்களை கேட்க பிடிக்குமா ? யாரும் பிடிக்காதுன்னு சொல்ல மாட்டிங்கனு நினைக்கிறேன். பாடல்களை காலங்களின் அடிப்படையிலையோ அல்லது இசை அமைத்தவரை வைத்தோ தரம் பிரிக்கும் பழக்கம் நம்மிடையே இன்னிக்கும் இருந்து வருகிறது. சிலருக்கு இளையராஜா இசை , சிலருக்கு ஏ ஆர் ரெஹ்மான் , சிலருக்கு புதிய பாடல்கள் , சிலருக்கு இடைக்கால பாடல்கள் இப்படி தரம் பிரித்து பாடல்களை ரசித்து வருகிறோம். சரி என்ன சொல்ல வரனு கேட்குறிங்களா, இவங்கல்லாம் இல்லாம இன்னிக்கும் நம்மை ரசிக்க வைக்கும், தாளம் போடா வைக்கும் மிக பழைமையான பாடல்கள் தொகுத்தா என்னனு மனசுல ஒரு பட்சி சொல்லிச்சி . சரின்னு எனக்கு பிடிச்ச சில பாடல்கள் இங்க இணைச்சிருக்கேன்.

வாங்க உங்களை அந்த காலத்துக்கே கூட்டிட்டு போகிறேன். T R மகாலிங்கம் அவர்கள் பாடிய ஒரு பாடல், இன்றைக்கு இதைகேட்டாலும் நம்மை அறியாமல் ஒரு உற்சாகம் தொற்றிக் கொள்ளும்.

அடுத்த வீட்டு பெண் என்ற படத்தில் வரும் ஒரு இனிமையான பாடல் "கண்ணாலே பேசி பேசி கொள்ளாதே"

MGR நடித்த "குலேபகாவலி" என்ற படத்தில் வரும் "மயக்கும் மாலை பொழுதே" என்ற பாடல்

பாவை விளக்கு என்ற படத்தில் இடம்பெற்ற "காவியமா , நெஞ்சின் ஓவியமா" என்ற பா டல்.

MGR நடித்த "அலிபாபாவும் 40 திருடர்களும்" என்ற படத்தில் இடம்பெற்ற பாடல்.

ஜெமினி கணேசன் நடித்து வெளிவந்த "காத்திருந்த கண்கள்" என்ற படத்தில் வரும் பாடல்கள்.

வண்ணக்கிளி என்ற படத்தில் இடம்பெற்ற பாடல் "சின்ன பாப்பா எங்கள் செல்ல பாப்பா"

ஆலயமணி என்ற படத்தில் இடம்பெற்ற "தூக்கம் உன் கண்களை", இந்த பாட்ட கேட்டுகிட்டே அப்படியே தூங்கலாம். அவ்வளவு அருமை

இரு வல்லவர்கள் என்ற படத்தில் இடம்பெற்ற ஒரு இனிமையான பாடல்

"சாந்தி" என்ற படத்தி இடம் பெற்ற "யார் இந்த நிலவு என்ற பாடல்.

வீர அபிமன்யு என்ற படத்தில் இடம் பெற்ற "பார்த்தேன் சிரித்தேன்"

பலே பாண்டியா என்ற படத்தில் இருந்து "நான் என்ன சொல்லிவிட்டேன்" மற்றும் "அமைதியான நதியினிலே"

சுதந்திர தின வாழ்த்துக்கள்

2010-08-15T01:34:00.000-07:00

அனைவருக்கும் சுதந்திர தின நல்வாழ்த்துகள். ஆங்கிலேயரிடமிருந்து விடுதலை பெற்று 64 வருடங்களாகிறது. இந்த சுதந்திரம் கிடைக்க போராடி தங்கள் உயிரை/வாழ்கையை இழந்த தியாகிகளுக்கு நன்றி மற்றும் மரியாதை செலுத்தும் விதமாக சுதந்திர தினத்தை கொண்டாடுகிறோம். அப்படியே இந்த நாட்டுப்பற்று பாடல்களை பார்த்து,கேட்டு மகிழுங்கள்.

"Clint Eastwood" என்னும் ஒரு சிறந்த படைப்பாளி

2010-08-14T09:56:00.000-07:00

நானும் சிலநேரங்களில் ஆங்கிலபடங்களை பார்ப்பது உண்டு. அப்படி நான் பார்த்து ரசித்த ஒரு நடிகர் , தயாரிப்பாளர், இயக்குனர், இசை அமைப்பாளர் என்ற பல திறைமைகளுக்கு சொந்தக்காரர், 80 வயதை கடந்த "clint eastwood " என்ற அமெரிக்கர். இந்த வயதிலும் அவரால் ஒரு படத்தை இயக்கி அதை ஆஸ்கார் போட்டியில் இடம்பெற வைக்கும் திறமையை நினைக்கும் பொழுது வியப்பாய் உள்ளது.

இவரைப்பற்றிய ஒரு சிறிய அறிமுகம், இவர் 1930 ல் "சான் பிரான்சிஸ்கோ" வில் பிறந்தவர். இவர் மேற்கத்திய திரைப்படங்களில் நடித்து புகழ் பெற்றவர். "மேற்கத்திய சினிமா" என்றாலே முதலில் நினைவில் வருவது இவரது பெயராகத்தான் இருக்கும். இதுவரைக்கும் 5 முறை அகாடெமி அவார்ட்ஸ் மற்றும் 5 முறை கோல்டன் க்ளோப் அவார்ட்ஸ் போன்றவற்றை பெற்றவர்.

இரண்டு வருடங்களுக்கு முன்னாள் எனக்கு இவரைப்பற்றி தெரியாது. ஒருசமயம் இவர் சமீபத்தில் நடித்து , இயக்கிய "Gran Torino " என்ற படத்தை பார்க்க ஒரு சந்தர்ப்பம் கிடைத்தது.ஒரு வயதான முதியவர்தான் படத்தின் நாயகர். மிகவும் மெதுவாக சென்ற படத்தில், படத்தின் முடிவில் "யாருடைய படம் இது" என்று என்னை கேட்கவைத்தவர். அதற்க்கு பிறகுதான் இவருடைய படங்களை திரட்டி பார்க்க ஆரம்பித்தேன். அப்படி இவருடைய படங்களை பார்க்க முடிவு செய்த பொழுது என்னுடைய அமெரிக்க நண்பர் ஒருவரால் முதலில் பரிந்துரை செய்யப்பட்ட படம் "The Good , The Bad and The ugly" என்ற மேற்கத்திய திரைப்படம். வழக்கமான புதையலை கண்டுபிடிக்க செல்லும் மூன்று பேர்களை பற்றிய திரைப்படம். இது வழக்கமான திரைப்படம்தன் என்றாலும் , இதன் இசை, அனைவரின் நடிப்பில் சமமான பங்களிப்பு போன்றவற்றால் என்னை மிகவும் கவர்ந்தது. இவர் சுருட்டு குடிக்கும் பாணி எனக்கு மிகவும் பிடிக்கும். பொதுவாக இவருடைய படங்களில் மிக குறைந்த வசனம் பேசுபவர் இவராகத்தான் இருக்கும். எனக்கு ரொம்ப நாளாக ஒரு சந்தேகம் இருக்கிறது , இவரை பார்த்துதான் ரஜினி காந்த் சிகரெட் பற்றவைக்க கற்று கொண்டாரோ என்று.

நான் ரசித்து பார்த்த இறுதி காட்சி "The Good , The Bad and The ugly " ல் இருந்து. இதன் இசையும் , யார் முதலில் சுடுவார்கள் என்ற ஒவ்வொருவரின் தவிப்பும் அருமையாக படமாக்கபட்டிருக்கும்.

இதே போன்று "Few Dollars More" என்ற திரைப்படம், இந்த படத்தின் இசைக்கு நான் அடிமைன்னு கூட சொல்லலாம். அதில் வரும் இறுதி காட்சியை கீழே இணைத்துள்ளேன். இந்த படத்தின் தீம் மியூசிக் நம்ம தமிழ் படத்தில் காபி அடித்த மாதிரியே இருக்கு ஆனால் என்ன படம் என்று தெரியவில்லை. யாராது தெரிஞ்சா சொல்லுங்க. நான் ஏன் இறுதி காட்சிகளை குறிப்பிட்டு இணைத்துள்ளேன் என்றால் , இவருடைய படங்களில் அதிகம் பேசப்படுவது அவர் படங்களை முடிக்கும் விதம்.

இவருடைய படைப்புகளில் என்னால் மறக்க முடியாத ஒரு சிறந்த திரைப்படம் என்றால் "Unforgiven" என்ற திரைப்படத்தைதான் சொல்வேன். இவர் இப்படத்தில் செய்த "வில்லியம் முன்னி" என்னும் கேரக்டர் ஒரு உண்மை சம்பவத்தின் அடிப்படையில் உருவாக்கபட்டது. இப்படத்தை அவரே இயக்கி இருப்பார். இவருக்கு "academy award " பெற்றுதந்த திரைப்படம். இப்படத்தில் மிகவும் புகழ் பெற்ற இறுதிகாட்சி.

நீங்கள் கண்டிப்பாக பார்க்க வேண்டிய அவர் நடித்த மற்றும் இயக்கிய படங்களின் தொகுப்பை கீழே கொடுத்துள்ளேன்.

The Unforgiven
Dirty Harry
Heartbrake Ridge
Gran Torino
The Rookie
The Outlaw Josey Wales
Sudden Impact
The Dead Pool
Hang 'Em High
Fist Full Of Dollars
For A Few Dollars More
Joe Kid
Pale Rider
High Planes Drifter
The Enforcer
Escape From Alcatraz
In The Line Of Fire
Absolute Power
The Good, The Bad, And The Ugly
Firefox
Millon dollar baby"
Mystic river
The bridges of Madison County.
Blood Work
Gran torino
letters from Iwo juma

நீங்களும் உங்களுக்கு நேரம் கிடைத்தால் இவருடைய படங்களை பாருங்கள். இவருடைய அருமையான,ஆரவாரம் இல்லாத நடிப்பு உங்களுக்கு கண்டிப்பாக பிடிக்கும்.

சிரிக்க வைத்தது & சிந்திக்க வைத்தது.

2010-08-10T08:44:00.000-07:00

சிரிக்க வைத்தது

சமீபத்தில் எனக்கு வந்த "SMS " என்னை குலுங்க குலுங்க சிரிக்க வைத்தது. நீங்களும் படிச்சி பாத்திட்டு சொல்லுங்க, அது ஆங்கிலத்துல வந்தது ஆனா அத தமிழ்ல எழுதி இருக்கேன்.

ஒரு காதலி தன்னுடைய காதலனுக்கு அனுப்பிய "SMS " கீழே ,

நீ தூங்கி கொண்டிருந்தால், உன்னுடைய கனவுகளை எனக்கு பரிசாக அனுப்பி வை

நீ அழுது கொண்டிருந்தால், உன்னுடைய கண்ணீரை எனக்கு பரிசாக அனுப்பி வை

நீ சிரித்து கொண்டிருந்தால், உன்னுடைய சிரிப்பை எனக்கு பரிசாக அனுப்பி வை

அதற்கு அவன் திரும்ப அனுப்பியது,

ஐயோ கடவுளே... நான் இப்ப "Toilet " ல இருக்கேனே !!!!!!!

-----------------------------------------------------------------------------------------------------------------------

சிந்திக்க வைத்தது

வானத்துல பறக்கிற சின்ன பறவை உங்க கண்ணுல கக்கா போய்டுச்சுன்னு வச்சுக்குங்க , அத பத்தி கவலை படாதிங்க , கலங்காதிங்க , கடவுளுக்கு நன்றி சொல்லுங்க , ஏன்னு கேட்கிறிங்களா ..ஏனா ....கடவுள் யானைக்கு பறக்கிற சக்தி கொடுக்கல பாருங்க அதான். சந்தோசமா இருங்க. இது எப்படி இருக்கு.

ரஜினியும் காதல் பாடல்களும்

2010-08-07T08:03:00.000-07:00

இளையராஜா இசையில் ரஜினி நடித்து 1984 ம் வருடம் வந்த திரைப்படம். இந்த பாடலின் இசை மற்றும் பாடல் வரிகளில் காதல் நிரம்பி இருக்கும். இது எனக்கு பிடித்த எத்தனை முறை கேட்டாலும் சலிக்காத பாடல் . நீங்களும் ரசியுங்கள்.

1983 ம் வருடம் ரஜினி நடித்து வெளிவந்த திரைப்படம் "தங்க மகன்", இதில் இளையராஜா இசையில் அமைந்த எத்தனை முறை கேட்டாலும் மீண்டும் கேட்க தூண்டும் பாடல் "ராத்திரியில் பூத்திற்க்கும் தாமரைதான் பெண்ணோ"

1981 ல் S.P முத்துராமன் இயக்கத்தில் வந்த திரைப்படம் "நெற்றிக்கண்", இதில் இளையராஜாவின் இசையில் "ராமனின் மோகனம்" என்னும் பாடல் அருமையான காதல் சொல்லும் பாடல்.

1980 ல் வெளிவந்த "அன்புக்கு நான் அடிமை" படத்தில் வரும் "காதோடு பூஒரச" பாடல். ரதி க்கும் ரஜினிக்குமான காதல் பாடல் கீழே.

1977 ல் வெளிவந்த திரைப்படம் "புவனா ஒரு கேள்வி குறி". இதில் இளையராஜாவின் இசையில் "விழியிலே மலர்ந்தது " பாடல் அருமையான "கவிதை வரிகளின்" தொகுப்பு.

1978 ல் வெளிவந்த திரைப்படம் பிரியா. இது எழுத்தாளர் சுஜாதாவின் முதல் திரைப்படம் என்று நினைக்கிறேன். எந்திரன் சுஜாதாவின் கடைசி படமாகியது எதிபாராத ஒன்றுதான்

1979 ல் வெளிவந்த "தர்ம யுத்தம்". இதில் இளையராஜாவின் இசையில் "ஆகாய கங்கை" என்னும் பாடல் அருமையான இன்னிசையாய் நமக்கு அமைந்த பாடல்.

ரஜினியின் திரைப்பட வாழ்கையில் அவருக்கு ஒரு சிறந்த மைல் கல்லாக அமைந்த படம் 1980 ல் வெளிவந்த "முரட்டு காளை"

"எந்த பூவிலும் வாசமுண்டு" என்ற பாடல் கீழே

1982 ல் வெளிவந்த "புது கவிதை" என்ற படத்தில் இளையராஜாவின் இசையில் "வெள்ளை புறா ஒன்று " என்ற பாடல் ஒரு மனதை தொடும் பாடல்.

1984 ல் வெளிவந்த "நான் மகான் அல்ல " என்ற படத்திலிருந்து "மாலை சூடும் வேளை"

உன்னைத்தானே தஞ்சம் என்று நம்பி வந்தேன்" என்ற பாடல் 1984 ல் வெளிவந்த நல்லவனுக்கு நல்லவன் என்ற திரைப்படத்தில் இருந்து.

1986 ல் வெளிவந்த "நான் அடிமை இல்லை' என்ற படத்தில் வரும் ஒரு மிக அருமையான பாடல் "ஒரு ஜீவன்தான்"

1989 ல் பாரதிராஜா இயக்கத்தில் இளையராஜ இசையில் கொடிபறக்குது என்ற படத்தில் இடம்பெற்ற "ஓ காதல் என்னை காதலிக்க வில்லை என்ற பாடல் ..

1989 ல் வெளிவந்த சிவா என்ற படத்தில் வரும் அடி வான்மதி என்ற பாடல் .

1982 ல் வெளிவந்த "தனி காட்டு ராஜா" என்ற படத்தில் இளையராஜா இசையில் "சந்தன காற்றே"

இந்த பாடல்களின் தொகுப்பை பார்க்கும் பொழுது ரஜினி அவருடைய படங்களில் காதல் பாடலுக்கு கொடுத்த முக்கியத்துவம் தெரிகிறது. உங்களுக்கு இந்த தொகுப்பு பிடிக்குமென்று நினைக்கிறேன். நன்றி.

நம்பிக்கை மற்றும் ஈடுபாடு...ஒரு உதாரணம்

2010-07-28T08:43:00.000-07:00

இந்த தகவல் எனக்கு மின்னஞ்சலில் வந்தது. அதை உங்களுடன் பகிர்ந்து கொள்ள இந்த பதிவு.

வருடம் 2004 , இந்தியா மற்றும் ஆஸ்திரேலியா இடையேயான கிரிக்கெட் போட்டி. அன்றைய போட்டியில் சச்சினை ஆட்டமிழக்க செய்தவர் பிராட் ஹாக்.

அந்த போட்டியின் முடிவில் அவர் அந்த பந்தை சச்சினிடம் கொடுத்து அதில் அவருடைய ஆட்டோக்ராப் ஐ வாங்கினார். அதில் சச்சின் எழுதிய வரிகள் கீழே.

அதற்கு பிறகு இன்றுவரை 27 முறை இருவரும் சந்திக்கும் வாய்ப்பு கிடைத்தது. ஆனால் அவரால் சச்சினை ஆட்டமிழக்க செய்ய இயலவில்லை. இதுதான் நம்பிக்கை மற்றும் ஈடுபாடு. அதற்க்கு ஒரு உண்மையான உதாரணமாக வாழ்ந்து வருபவர் நம்ம சச்சின்.

இன்றைய போட்டியில் சதம் அடித்த சச்சினுக்கு வாழ்த்துக்கள்.

பிடிச்சிருந்தா அப்படியே "லைக்" பட்டன கிளிக்குங்க.

சூப்பர் ஸ்டார் ரஜினி நடித்த அற்புத காட்சிகள்

2010-07-24T14:15:00.000-07:00

நம்ம சூப்பர் ஸ்டார் நடித்த சில அற்புதமான காட்சிகளை உங்களுடன் பகிர்ந்து கொள்கிறேன், அவர் ஆரம்ப காலங்களில் நடித்து வெளி வந்த சில படங்களை பார்க்கும்பொழுது இப்படி நடித்தவரா பிற்காலத்தில் ஒரு அதிரடி கதாநாயகனாக மாறினார் என்று நினைக்க தோன்றும்.

அவர் நடித்து 1978 ல் வெளிவந்த திரைப்படம் "முள்ளும் மலரும்". அதில் வரும் சில காட்சிகளை இங்கே இணைத்துள்ளேன். அந்த காட்சிகளை பாருங்கள்.

கெட்ட பய சார் காளி

மற்றொரு காட்சி ..!!!

ராமன் ஆண்டாலும் ராவணன் ஆண்டாலும் எனக்கொரு கவலையில்லை ...!!!

படம் : அவர்கள்.

இத்திரைப்படம் 1977 ல் பாலசந்தர் இயக்கத்தில் வெளிவந்த திரைப்படம். இதில் ரஜினி நெகடிவ் கதாபாத்திரத்தில் நடித்திருப்பார். கண்டிப்பாக இவருடைய வில்லன் நடிப்பு இன்றைய நடிகர்களுக்கு ஒரு உதாரணம். இதில் அவர் வசனம் பேசும் விதம் எனக்கு மிகவும் பிடிக்கும். நீங்களும் ரசியுங்கள் ...

அவர்கள் படத்தில் மற்றொரு காட்சி

படம் : எங்கேயோ கேட்ட குரல்

1982 ல் வெளிவந்த திரைப்படம். அதில் இடம் பெற்ற அருமையான பாடல் இது. இதில் அவரின் எதார்த்தமான நடிப்பை ரசியுங்கள்.

பட்டு வண்ண சேலை காரி

படம் : மூன்று முடிச்சு

1976 ல் பாலச்சந்தர் இயக்க்கத்தில் வெளிவந்த திரைப்படம் , இதில் அவர் நெகடிவ் ரோலில் நடித்து இருப்பார் , அதில் வரும் ஒரு பாடல் இங்கே ..

படம் : தில்லுமுல்லு.
1981 ல் வெளிவந்த மற்றும் ரஜினி காமெடியில் கலக்கிய படம்.
இது நான் மிக விரும்பிய படங்களில் ஒன்று.

இது போன்று நான் சூப்பர் ஸ்டாரை ரசிச்ச காட்சிகள் ஏராளம். ஆரம்ப காலங்களில் இவர் தேர்வு செய்த சில படங்கள் இன்று அறிமுக நாயகன் கூட நடிக்க யோசிக்கும் கதாபாத்திரங்கள். இது போன்ற படங்களில் மீண்டும் இவர் நடிப்பாரா என்பது பல சினிமா ரசிகர்களின் கனவும் கூட ஆனால் அது நிறைவேற மிக குறைந்த வாய்ப்பே உள்ளது என்பது அனைவருக்கும் தெரிந்ததே. நான் மேலே இணைத்த காட்சிகள் உங்களுக்கும் பிடிக்கும் என்று நினைக்கிறேன். இன்னும் சிறந்த சில காட்சிகளை மற்றொரு பதிவில் தருகிறேன். நன்றி.

இளவெயில் மாலை பொழுது

2010-07-23T10:25:00.000-07:00

மனைவி அமைவதெல்லாம் இறைவன் கொடுத்த வரம்..!!!

2010-07-22T13:23:00.000-07:00

திருமணம் என்பது ஆயிரம் காலத்து பயிர் என்பார்கள். ஒருவனுக்கு மனைவி அமைவது அவனுக்கு இறைவன் கொடுத்த வரம் ஆகும். அன்பும் அறனும் உடைய இல்வாழ்க்கை அமைய கணவன் மனைவி இடத்தே ஜாதகப்பொருத்தம் தேவை என்கின்றார்கள். நான் ஜோதிடன் கிடையாது ஆனால் இதை பற்றி அறிந்து கொள்ளும் ஆர்வத்தால் பல புத்தகங்களில் இருந்து நான் தெரிந்து கொண்டதை உங்களுடன் பகிர்ந்து கொள்கிறேன்.

ஒருவனுக்கு ஒரு சிறந்த இல்வாழ்க்கை அமைய வேண்டுமானால் கணவன் மற்றும் மனைவி இருவருடைய ஜனன ஜாதகத்திர்கிடையே 10 வித பொருத்தங்கள் வேண்டும். இந்த பத்து பொருத்தங்கள் கீழே கொடுக்கப்பட்டுள்ளது.

தினம்
கணம்
மகேந்திரம்
ஸ்திரிதீர்கம்
யோனி
ராசி
ராசி அதிபதி
வசியம்
ரஜ்ஜு
வேதை

இதில் கணம் , யோனி மற்றும் ரஜ்ஜு என்ற மூன்று பொருத்தங்கள் மிக முக்கியமானவை. இவற்றில் ஒன்று பொருந்தவில்லை என்றாலும் திருமணமே செய்ய கூடாது என்கின்றார்கள். ஜோதிட சாஸ்திர படி 27 நட்சத்திரங்கள் 12 ராசிகள் ஒவ்வொரு நட்சத்திரத்திற்கும் 4 பாதங்கள். சரி திருமண பொருத்தம் எப்படி கணிக்கிறார்கள் எனபதை பார்போம்.

பொருத்தம் பார்க்க போகும் முன்னர் இந்த அட்டவணைகளை பார்த்து வைத்து கொள்ளுங்கள்,

சரி பொருத்தம் பார்க்கலாம் வாங்க ...

தினப்பொருத்தம்

பெண்ணின் நட்சத்திரத்தில் இருந்துதான் மாப்பிள்ளையின் நட்சத்ரத்தை ஒப்பிட்டு இதை கண்டுபிடிக்க வேண்டும். பெண்ணின் நட்சத்திரத்தில் இருந்து மாப்பிள்ளையின் நட்சத்திரம் வரை எண்ணுங்கள். எண்ணி வரும் தொகையை 9 ஆல் வகுக்க மீதி 3 , 4 மற்றும் 7 வந்தால் அசுபம் அதாவது பொருத்தம் இல்லை. வேறு எது வந்தாலும் பொருத்தம் சுபமாக உள்ளது. பின் வரும் ஏக நட்சத்திரங்கள் பொருந்தாது. அசுபதி, கார்த்திகை , மிருகசீ ரிஷம், புனர் பூசம், பூரம், உத்திரம், சித்திரை, அனுஷம், பூராடம், உத்திராடம்.

கணப்பொருத்தம்

ஒருவருடைய குணம் எப்படிபட்டது எனபதை இந்த பொருத்தம் குறிக்கிறது.மூன்று கணங்கள் உண்டு அவை தேவ கணம் , மனித கணம் மற்றும் ராஷஸ கணம் , ஆண் பெண் நட்சத்திரன்கள் ஒரே கணத்தில் அமைவது உத்தமம். தேவ கணத்திலோ, மனுஷ கணத்திலோ பிறந்த பெண் எந்த கணத்தில் பிறந்த ஆணோடும் ஒத்து போவாள் ஆனால் ராஷஸ கணத்தில் பிறந்த பெண் மனுஷ கணத்தில் பிறந்த ஆணோடு ஒத்து போக மாட்டாள்.

மகேந்திர பொருத்தம்

பெண்ணின் நட்சத்திரத்தில் இருந்து என்னும் பொழுது ஆணின் நட்சத்திரம் 4 ,7 ,10 ,13 ,16 ,19 ,22 ,25 ஆக வந்தால் பொருத்தம். மற்றவை கூடாது.

ஸ்திரிதீர்கம்

பெண்ணின் நட்சத்திரத்தில் இருந்துஎன்னும் போது ஆணின் நட்சத்திரம் 13 க்கு மேல் வந்தால் பொருத்தம் , 7 க்கு மேல் வந்தால் மத்திமம் , 7 க்குள் வந்தால் கூடாது/

யோனி பொருத்தம்

இந்த பொருத்தம் படி , ஆண் நட்சத்திரத்திற்கு உரிய மிருகம் ஆண் மிருகமாகவும் ,பெண் நட்சத்திரத்திற்கு உரிய மிருகம் பெண் மிருகமாகவும் நல்லது. மாறி இருந்தால் பரவா இல்லை ஆனால் பகை மிருகமாக வர கூடாது. திருமணத்திற்கு இந்த பொருத்தம் அவசியம் ஆகும்.

ராசி பொருத்தம்

பெண்ணின் ராசியில் இருந்து என்னும் போது 6 , க்கு மேல் வர வேண்டும் 8 வரக்கூடாது.

ராசி அதிபதி பொருத்தம்

பெண்ணின் ராசிக்குரிய அதிபதியும் , ஆணின் ராசிக்குரிய அதிபதியும் பகையாக இருக்க கூடாது. சமமாகவோ அல்லது நட்பாகவோ இருக்க வேண்டும்.

வசியப் பொருத்தம்

பெண் ராசியும் , ஆண் ராசியும் வசியமுடையதாக இருக்க வேண்டும்.
எந்த ராசி , எந்த ராசிக்கு வசியம் உடையது என்பதை பற்றிய விபரம்,

ரஜ்ஜு/மாங்கல்ய பொருத்தம்

பெண் நட்சத்திரமும் ஆண் நட்சத்திரமும் ஒரே ரஜ்ஜுவில் வரக்கூடாது.

மிருகசீ ரிஷம் , சித்திரை, அவிட்டம் - சிரசு ரஜ்ஜு. பொருள் : கணவன் மரணம்.

ரோகினி , திருவாதிரை , ஹஸ்தம், சுவாதி, திருவோணம் , சதயம் - கன்னட ரஜ்ஜு . பொருள் : மனைவி மரணம்.

கார்த்திகை, புனர் பூசம் , உத்திரம், விசாகம், உத்திராடம் , பூரட்டாதி - வயிறு ரஜ்ஜு .பொருள் : புத்திர தோஷம்.

பரணி , பூசம் , பூரம், அனுஷம் , பூராடம் , உத்திரட்டாதி - துடை ரஜ்ஜு . பொருள் : ஒற்றுமை குறைவு

அசுபதி, ஆயில்யம் , மகம், கேட்டை, மூலம், ரேவதி - பாத ரஜ்ஜு . பொருள் : நோய் நொடிகள் ஏற்படும்.

வேதைப் பொருத்தம்
பெண் மற்றும் ஆண் நட்சத்திரம் ஒன்றுக்கு ஒன்று கீழ்க்கண்டவாறு இருக்க கூடாது,

இப்படிதாங்க திருமண பொருத்தம் பார்கிறார்கள். இந்த வகையான ஜாதக கணிப்புகள் எவ்வளவு உண்மை என்று தெரியா வில்லை , இதை நம்பாதவர்களும் இருக்கத்தான் செய்கிறார்கள். என்னை பொருத்த வரை இந்த பொருத்தங்களை விட , ஆண் பெண் மனப் பொருத்தம்தான் முக்கியம். தயவு செய்து காதலித்து திருமணம் செய்து கொள்ளுபவர்கள் , இந்த விஷயங்களை ஒதுக்கி வைப்பதே நல்லது என்பது என் கணிப்பு.

இந்த பதிவு உங்களுக்கு பிடித்து இருந்தால் ஓட்டு போட்டுட்டு போங்க நண்பர்களே...!!!

ஆறுதல் - சிறுகதை

2010-07-22T03:31:00.000-07:00

இருபது வருடங்களாகிறது,என்னுடைய சொந்த ஊருக்கு போய் ...இதோ நாளை கிளம்ப போகிறேன். என்னுடைய பள்ளி வாழ்க்கையும் கல்லூரி வாழ்க்கையும் தொலைந்து போன இடம். படிப்பு முடிந்து,ஊரை விட்டு வந்து சென்னையில் தனியார் கம்பெனியில் கம்ப்யூட்டர் உதவியாளராக பணி கிடைத்து பின்னர் என்னுடைய படிப்படியான முன்னேற்றம், என்னை வெளி நாடு அனுப்பியது. பின்னர் திருமணம் , குழந்தைகள் எல்லாம் அங்கேயே. என்னுடைய ஒரே ஆசை , இறுதி காலத்தை சொந்த ஊரில் செலவிட வேண்டும் என்பதே. எவ்வளவு வயதானாலும், நம்முடைய இளமை கால நினைவுகள் நமக்கு ஆறுதல்தான்.யாரோ என்னுடைய பின்னால் வருவது தெரிந்து திரும்பினேன், என் மனைவிதான். "என்னங்க இன்னும் தூங்கலையா !!!! " என்று கேட்டுக்கொண்டு அருகில் வந்தாள். "எப்படி தூக்கம் வரும், இவ்வளவு வருடங்களுக்கு பிறகு ஊருக்கு போகிறோம்..!!! " என்று சொல்லிகொண்டே கண்ணை மூடினேன். தூங்க முயற்சி செய்தேன். தூக்கம் வர மறுத்தது..!!!!

இரவு எப்போ தூங்கினேன் நினைவில்லை, என்னங்க எழுந்திரிங்க, காபி ரெடி என்ற என்மனைவியின் குரல் என்னை எழுப்பியது. மெதுவாக எழுந்து உட்கார்ந்தேன்..இன்னும் என் உற்சாகம் குறைய வில்லை. இன்று மாலை கிளம்பப்போகிறோம். என்னுடைய பழைய நண்பர்களை சந்திக்க போகிறேன், இதோ இன்னும் இரண்டு நாட்கள், எங்கள் பூர்வீக மக்களை சந்திக்க போகிறேன். மனசு முழுவது ஆனந்தம்.

இரண்டு நாட்கள் நீண்ட பயணத்திற்கு பிறகு, நான் என் மனைவி மற்றும் என் மகன், கோவை வந்து இறங்கினோம். என் மகன் பிறந்து வளர்ந்தது எல்லாம் வெளிநாடு என்பதால் அவனுக்கு இது புதிய அனுபவம்தான். என் முகத்தில் ஒரு இனம் புரியாத சந்தோசம். என் தாய் நாடு எவ்வளவு அழகு.

என்னுடைய ஊர் கோவையில் இருந்து திருப்பூர் செல்லும் வழியில் உள்ள ஒரு சின்ன கிராமம், விமான நிலையத்தில் இருந்து , கார் வாடகைக்கு எடுத்து கொண்டு கிளம்பினோம். இன்னும் இரண்டு மணி நேரம், என்னுடைய பூர்வீக பூமியில் நான். இருந்தாலும் என் மனதில் ஒரு இனம் புரியாத கவலை, என் பழைய நண்பர்கள், சொந்தங்கள் இன்னும் இந்த ஊரில் இருப்பார்களா ....!!!!???? மனதில் ஆயிரம் கேள்விகள் ...!!!!

கார் எங்கள் ஊருக்குள் நுழைந்தது. இது நான் வாழ்ந்த ஊரா..? ஆச்சரியமாக இருந்தது ..பல மாற்றங்கள் ..நான் பார்த்த மண் ரோடுகள் இல்லை ... பசுமை நிறைந்த வயல் வெளிகள் இல்லை. ஒரு பெரியவர் மந்தையில் ஆடு மேய்த்து கொண்டு இருந்தார். வெறுமையாய் உணர்ந்தேன். டிரைவர் "கொஞ்சம் காரை நிறுத்துப்பா" என்றேன். காரை விட்டு இறங்கினோம். பெரியவர் தன் கையை கண்களுக்கு கொடுத்து எங்களை பார்த்தார். தம்பி யாருன்னு தெரியலயே..? புதுசா வரிங்களா? என்றார் ... எனக்கு அவரை நன்றாக தெரிந்தது, நான் சிறுவனாக இருக்கும் போது, எங்கள் ஊரில் மளிகை கடை வைத்து இருந்தவர். நான் அவர் அருகில் சென்றேன். அய்யா ..!!! என்னை தெரியலையா? என்றேன் ...!!! அவர் தெரியலயே என்றார்.

நான் என்னை அறிமுக படுத்திகொண்டேன். அய்யா .. நான் இந்த ஊரில் இருபது ஆண்டுகளுக்கு முன்னர் கிழக்கு வாசலில் (இடத்தின் பெயர்) வசித்த பெரியசாமியின் மகன். என்னுடைய பெற்றோர் மறைவுக்கு பின் இந்த ஊரை விட்டு போன ஆறுமுகம். உங்க கடைல கூட நிறைய வாங்கி இருக்கேன் என்றேன். இப்போ என்னுடை வரப்போகும் நாட்களை இங்கே என் நண்பர்களுடனும் , இந்தா ஊர் மக்களுடனும் செலவிட போகிறேன் என்றேன்.

பெரியவர் என்னை ஒரு முறை ஆச்சரியமா பார்த்தார் ... !! பெரியசாமி மகனாப்ப நீ ...!!!! பல வருசம்மாசேப்பா ..!!! எப்படி இருக்க ..இதுதான் உன் பொண்டாட்டி ..புள்ளையா? என்றார் .. !!!. ஆமாங்கையா ..என்றேன் ..!!!.

என்னப்பா நீ இந்த ஊரை விட்டு போன பிறகு ...காலம் மாற மாற ஒவ்வொருத்தரா ..இந்த ஊரை விட்டு பிழைப்பு தேடி போய்ட்டாங்கப்பா என்றார் ..!! எனக்கு இது அதிர்ச்சியாய் இருந்தது ...இப்ப யாருமே இல்லியாங்கய்யா என்றேன். இப்போ ஒரு 20 குடும்பம் இருக்கும்னு நினைக்கிறேன் என்றார்.சரி அவர்களில் யாரவது தெரிந்தவர்கள் இருக்கிறார்களா பார்க்கலாம் என்று கிளம்பினேன். அனைவரையும் பார்த்து விட்டு வருவதற்குள் மதியம் ஆனது ...உச்சி வெயில் சூடாக கொளுத்தியது. மனது ஒரே சோர்வாக இருந்தது ...காலையில் இருந்த உற்சாகம் இப்பொழுது இல்லை. மனம் வெறுமையாக இருந்தது. எதிர் பார்த்து வந்த யாரும் இங்கில்லை, என்னை நான் மிகவும் தனிமையாக உணர்ந்தேன். இந்த ஊரில் நான் வாழ்ந்த பழைய நினைவுகள் மனதில் பாரமாய் இருந்தது. என்னுடைய சந்தோசங்களை பகிர எனக்கு இங்க யாருமே இல்லை என்ற என் எண்ணம் என் சோர்வை அதிகமாக்கியது.

என் மனைவி, என்னிடம் திரும்ப போய்டலாமாங்க என்றாள்...!!! எனக்கு திரும்பி போகவும் மனம் இல்லை ...இங்க இருக்கவும் பிடிக்க வில்லை என்றேன் ..எனக்கு தெரிந்த பழகிய நண்பர்கள் யாரும் இல்லையே என்கின்ற கோவம். அப்படியே சோர்வை போக்க ஒரு மரத்தின் நிழலில் வந்து அமர்ந்தோம். சற்று தொலைவில் , காலையில் பார்த்த பெரியவர் வருவது தெரிந்தது. இந்த ஊரில் இவர் ஒருவர்தான் என்னை தெரிந்தவர் என்று நினைத்து கொண்டேன்.

அந்த பெரியவர் என்ன தம்பி ..இங்க உட்காந்திட்டிங்க ...என்று கூறிகொண்டே என் அருகில் வந்து நின்றார். நான் அவரை பார்த்து கொஞ்சம் சிரமமாய் புன்னகைத்தேன்.....அந்த பெரியவரும் சிரித்துகொண்டே .தம்பி இந்த இடம் நியாபகம் இருக்கா இங்க சின்ன புள்ளைல நீங்க நட்ட மரத்தின் அடியில்தான் நீங்க உட்காந்து இருக்கீங்க என்றார் .. என்றார். எனக்கு இது இன்ப அதிர்ச்சி ..என் கண்களில் கண்ணீர் .... என மனைவியிடமும் , மகனிடமும் சந்தோசமாய் கூறினேன் ..."இது நான் நட்ட மரம்.....இதி நான் நட்ட மரம் ...."அவர்கள் என்னை ஒரு குழந்தையை போல பார்த்தார்கள் ...பரவா இல்லை ... இந்த ஊரில் என் பழைய நண்பர் யாரும் இல்லை என்று நினைத்து வருந்திய எனக்கு ..இந்த மரம்தான் ஒரு ஆறுதல். இது நான் நட்ட மரம்.

நான் ரசித்த திரைப்படம்: மதராசப்பட்டினம்..!!

2010-07-11T09:03:00.000-07:00

மிக நீண்ட நாட்களுக்கு பிறகு நான் ரசித்த ஒரு திரைப்படம். பிரிடிஷ் அழகி "அமி ஜாக்சன்" கொள்ளை அழகு , இதயங்களை கொள்ளை கொள்ளும் அழகு. இவருக்காகவே இந்த படத்தை நூறு முறை பார்க்கலாம். :).

மிக அருமையான காதல் கதையை நேர்தியாக அதன் சுவை மாறாமல் படைதிற்கிறார் இயக்குனர். கதைக்களம் நமக்கு பழசுதான். "டைடானிக்", "லகான்" போன்ற படங்களை நினைவு படுத்துகிறது. ஆனால் கதை சொன்ன விதம் அதையெல்லாம் ஓரம் கட்டி விடுகிறது.

என்னைக்கவர்ந்த சில காட்சிகள்,

ஆர்யா ஆங்கிலம் கற்க்கும் காட்சி, தமிழில் அ, ஆ, இ, ஈ மாதிரி எ ஏ, பி பீ என்று படிக்கும் போது , திரைஅரங்கம் சிரிப்பால் அதிர்கிறது.

ஆர்யா ஆங்கிலம் கற்றுக் கொண்டு அதை முதல் முறை அமியிடம் தெரிவிக்க முயலும் போது அவருக்கு மறந்து விடும், அப்போ அமி ஆர்யவிடம் "மறந்திட்டியா" என்று தமிழில் கேட்கும் காட்சி. அவளின் காதலை ஒரு வரியில் உணர்த்தும் காட்சி.

மல்யுத்த சண்டை, ஆர்யா உண்மை மல்யுத்த வீரராகவே தெரிகிறார். அப்பொழுது ஆர்யா முதல் அடி அடிக்கும் போது, 400 வருஷத்துக்கு பிறகு நாம அடிக்கிறோம் என்ற வசனம் ரசிக்க வைத்தது.

இறுதிக்காட்சிக்கு சற்று முன்னர், ஒரு பெரியவர் தவறுதலாக இந்தியக் கொடியை அமியின் சட்டையில் குத்தி விடுவார், அதை அவர் திரும்ப எடுக்கும் பொழுது, அதை அமி தன் கையால் தடுப்பார். அருமையான காட்சி. இந்த மாதிரி நம்மை கவரும் காட்சிகள் பல...

நம்ம பழைய மதராச பட்டினத்தை அழகாக படம் ஆக்கி இருக்கிறார்கள். கொள்ளை அழகு. அதை படமாக்கிய ஒளிப்பதிவாளர் நீரவ் ஷா மற்றும் கலை இயக்குனர் செல்வ குமாரின் உழைப்பு தெரிகிறது. இது சாதாரண பொழுது போக்குப் படம் அல்ல என்பது படம் முடிந்து திரைஅரங்கத்தை விட்டு வெளிவருபவர்களின் முகத்தில் தெரிந்தது. இது கண்டிப்பாக அனைவரும் காண வேண்டிய திரைப்படம். எனக்கு இயக்குனரின் பொறுமை மிகவும் பிடித்திருந்தது அவ்வளவு பொறுமையாக காதலை படம் பிடித்திற்கிறார். வாழ்துகள் விஜய். ஆர்யாவுக்கு இது மற்றும் ஒரு மைல் கல்.

"அம்மா துரையம்மா" பாடல் வரிகளில் நம்முடைய பண்பாடு தெரிகிறது.

ஆறுயிரே ஆறுயிரே பாடலில்

"கண்ணீரில் முடிந்தால்தான் காதல் காவியம்..மேற்றினில் வாழ்வேனோ..--உன் தோல்களில் சாய்வேனோ..உன் கைவிரல் பிடித்து காதலில் திலைத்து...காலங்கள் மறப்பேனோ..." என்ற வரிகள்... இதயத்தில் நுழைந்து செல்கிறது....!!!

வார்த்தை தேவையில்லை ..வாழும் காலம் வரை.... பாவை வாழ்வின் ஒளி பேசுமே... அருமையான வரிகள்.... பூக்கள் பூக்கும் பாடலில்..

ஜீ வீ பிரகாஷ் பின்ணனி இசை படத்துக்கு சிறப்பு

இப்படி ஒரு சிறப்பான படத்தை கொடுத்த எஸ். அஹொரம் சகோதரர்களுக்கு பாராட்டுகள்.

கண்டிப்பாக பார்க்க வேண்டிய படம்.... குடும்பத்துடன் பார்க்கலாம்..